copyright 1996 - 2002 by Ulrich Schmitz

WORÖM DÄ JANZE DRESS MET DEM SCHWAADLAPPE ?
Wä sesch schunn ens op minger Homepage op Kölsch ömjeluurt hätt, un dat nit eets zick jestere,
dä weiß, dat dä Schmitzefuss zick üvver zwei Johre allt en Homepage hätt,
un zick dem eetste Daach en Kölsch, minger Muttersprooch.

Dat kom esu: Isch wor damols in Baden-Baden jestrandet. Et wor jo janz nett, ävver irjenzwie hätt mir jet jefählt...
Hück weiß isch jenau, wat dat wor, un isch hann mir jeschwore, dat dat nie widder vüürkütt: Et wor die Entfernung vun Kölle.
Jetz weede einije Lückscher laut laache. Wat will dä Jeck dann? Dat sin doch nur 350 Kilometer, dat es doch ene Katzesprung!
Sescher dat, dat es nit wick, ävver et reich ! Do kans jo och nit jede Sunndaach noh Hus fahre,
eetstens jeit et en de Flüh (150 Euro Fahrtkosten), zweitens hässte jo auch jet ze dunn, wat de die Woch üvver nit jedonn kriss...

Koot jesaat: Isch däät ming Heimat doch ärch vermisse. Un wenn isch minge Videos vun Karneval
un die Plaate vun The Piano has been drinking, Bläck Fööss, BAP , Brings
un all die andere nit jehatt hätt, isch hätt ävver vill bedrissener usjesinn...

Saach et wie et es: viermol em Jahr noh Kölle es nit jenoch !
Ihr künnt Üch nit vüürstalle wat dat för e Jeföhl wor, em Möbelwage noh Kölle ze sitze ! Unbeschreiblich !
Schon vor dem Umzug hatt isch Kontak zo dem Winkelmanns Uli jefunge, un mir hatte emails usjetuusch.
Et kom zum Treffe, un im Beruf klappte et och joot, koot: Isch wor doheim ! FREU !

Koot donoh daachten isch: Et müßt doch noch mieh Jecke wie isch jevve,
die (wie dä Hövels Jupp us Ustralie) öfters ens jet
Kölsch kalle wööde, wann et jingk: Ävver dä Kölsche IRC-Kanal
es jet für Teenies, un Kölsch wood do och nit jeschwaad.
Also hann isch kooterhand ene eijen Chatroom in et Levve jeroofe:
Unse Schwaadlappe-Chat.

Un wat drus jewoode es, wißt ihr all:
Zig Treffe hann mir allt hinger uns, dausend vüür uns,
un wann immer einer vun drusse noh Kölle kütt:
Aanrof jenüüch, un mir treffe uns un schwaade de Schnüß....

Un isch verspreche Üch: Sulang et noch eine Jeck jitt, dä irjenzwo
op dr Ääd erömjitsch un Heimweh noh Kölle hätt, dä bruch nur
op ming Sick ze kumme, un e janz klei bessche vun dem Heimweh jeit flööte....

Esu, dat moot ens erus. Maat et joot,
Üre
Schmitzefuss